انضمام الحق نے جاوید میانداد کو بیٹسمینوں کا ہیرو قرار دیدیا

سابق کپتان انضمام الحق نے جاوید میانداد کو تمام بیٹسمینوں کا ہیرو قرار دے دیا۔
انضمام الحق نے سابق کپتان اور عظیم بیٹسمین جاوید میانداد کو زبردست انداز میں خراج تحسین پیش کیا ہے۔ انھوں نے کہا کہ میانداد کسی بھی عمر میں بیٹنگ سے نہیں گھبراتے تھے، اگر آپ انھیں آج کھیلنے کا کہیں تو تیار ہو جائیں گے، ایک بار نیوزی لینڈ کے ٹور میں وہ کوچ اور میں کپتان تھا، انجریز کی وجہ سے ہمیں بیٹسمینوں کی کمی کا سامنا ہوا، فوری طور پر متبادل کا بھی بندوبست نہیں ہو سکتا تھا، اتنے میں جاوید میانداد نے کہا کہ ایک بیٹسمین تیار ہے، میں نے پوچھا کون تو انھوں نے کہا کہ میں خود، میں نے کہا کہ آپ نے کنڈیشنز دیکھی ہیں اور آپ کو تو کھیلے ہوئے عرصہ ہو چکا مگر انھوں نے کہا کہ فکر نہ کرو میں کھیل لوں گا، میں نے کہا کہ پہلے نیٹ میں بیٹنگ کریں اور وہ اس پر تیار ہو گئے، انھیں ہمیشہ اپنی بیٹنگ پر اعتماد رہا۔

انضمام نے کہا کہ میں ایک ایسے پلیئر کے بارے میں بات کر رہا ہوں جو ہمارے دور میں تمام بیٹسمینوں  تھا،کا ہیرو میں سمجھتا ہوں کہ وہ پاکستان کی جانب سے سامنے آنے والے سب سے عظیم ترین بیٹسمین تھے، ایک بار مجھے مشتاق محمد نے بتایا کہ جب وہ آسٹریلیا کے ٹور پر گئے تو میانداد نوجوان تھے، ہر کوئی ٹاپ پر بیٹنگ سے گھبراتا تھا مگر وہ ہمیشہ ہی اوپر کے نمبرز پر کھیلنے کو بے چین رہتے، میانداد بے خوف ہوکر کھیلتے، وہ دنیا کے بہترین بولرز سے فقرے بازی کرتے اور اپنی اننگز کے دوران ظاہر ہی نہیں ہونے دیتے تھے کہ کتنی مشکل صورتحال میں بیٹنگ کر رہے ہیں۔ انضمام نے مزید کہا کہ میانداد نے کبھی تکنیک پر بات نہیں کی، وہ بطور کوچ ہمیشہ بیٹسمینوں کو رنز بنانے کے طریقے بتاتے، ویسے بھی دنیا کے تمام عظیم بیٹسمینوں کورنز کرنے کی ہی زیادہ فکر ہوتی ہے۔

بشکریہ ایکسپریس نیوز

Visit Dar-us-Salam Publications
For Authentic Islamic books, Quran, Hadith, audio/mp3 CDs, DVDs, software, educational toys, clothes, gifts & more... all at low prices and great service.